የኦሮሞና አማራ ህዝቦች የትስስር መድረክ  ኮንፈረንስ በባህር ዳር

one_love_2.jpg

“የኦሮሞና አማራ ህዝቦች ትስስር መድረክ ኮንፈረንስ” ጥቅምት 25 ቀን 2010 ዓ.ም በባህር ዳር ከተማ ይካሄዳል። ተሳታፊዎች ወደ ባህር ዳር እያቀኑ ነው:: ኮንፍረንሱን የኦሮሚያ ብሄራዊ ክልላዊ መንግስት ርእሰ መስተዳደር አቶ ለማ መገርሳ እና የአማራ ክልል ርእሰ መስተዳድር አቶ ገዱ አንዳርጋችዉ በጋራ ይመሩታል

የኦሮሞና አማራ  ክልሎች የመንግስት ኮሙዩኒኬሽን ቢሮ ኃላፊዎች አቶ ንጉሱ ጥላሁን እና አቶ አዲሱ አረጋ የምክክር መድረኩን ዓላማና ያለውን ፋይዳ አስመልክቶ መግለጫ ሰጥተዋል፡፡

የምክክር መድረኩ “አብሮነታችን ለሰላማችን፤ ሰላማችን ለአብሮነታችን!” በሚል መሪ መልዕክት እንደሚካሄድ አስታውቀዋል።

በኮንፍረንሉ ላይ ለመካፈልም ከ20 የኦሮሚያ ዞኖችና ከ18 ከተሞች የተወጣጡ ከ250 በላይ የሚሆኑ የኦሮሞ አባ ገዳዎች፣ የሀገር ሽማግሌዎች፣ የሀይማኖት አባቶች፣ ምሁራን እና አርቲስቶች ዛሬ ማለዳ ወደ ባህር ዳር ከተማ ጉዞ መጀመራቸውን የኦሮሚያ ክልል የመንግስት ኮሙዩኒኬሽን ጉዳዮች ቢሮ ሃላፊ አቶ አዲሱ አረጋ አስታውቀዋል።

በኮንፍረንሱ የሁለቱን ወንድማማች ህዝቦች አንድነት፣ ለሀገራችን ሰላምና ሉዓላዊነት ስለከፈሉት የጋራ መስዋዕትነትና ስለፈፀሙት አኩሪ ገድሎች ተነስተው ውይይት እንደሚደረግባቸውም ገልፀዋል።

የሁለቱን ህዝቦች ፖለቲካዊ፣ ማህበራዊ እና ኦኮኖሚያዊ መስተጋብር የሚያሳዩ የህዝብ ለህዝብ ግንኙነቱ ተግዳሮቶች እና ቀጣይ እቅጣጫዎችን የሚያመላክቱ የውይይት መነሻ ፅሁፎች በምሁራን ቀርበው ውይይት እንደሚደረግባቸውም አብራርተዋል።

የአማራ ህዝብ በኮንስረፍሱ ላይ ለመካፈል ከኦሮሚያ ክልል የሚመጡ እንግዶችን የአባይ ድልድይ ላይ ለመቀበል ዝግጁ ሆኖ በመጠባበቅ ላይ መሆኑን አስታውቀዋል።

በፍኖተ ሰላም፣ በእንጀባራ እና በባህር ዳር ከተሞችም ለእንግዶቹ ደማቅ አቀባበል እንደሚደረግላቸው ገልፀዋል።

የኦሮሚያ ክልል መንግስት ከሁሉም የሀገሪቱ ክልሎች ጋር የህዝቦችን ወንድማማችነት እና አንድነት ሊያጠናክሩ የሚችሉ ቀጣይነት ያላችው ኮንፈረንሶች እንደሚያዘጋጅ አስታውቀዋል። (Radio Fana)