የኢራን-ኢራቅ መሬት መንቀጥቀጥ የዓመቱ ከፍተኛ ሞትን አስከትሏል

  • 14 ኖቬምበር 2017

More than 20 soldiers around and under a slab of concrete in a pile of rubbleImage copyright
EPA

አጭር የምስል መግለጫ

በኢራን የተሰማሩ ነፍስ አድን ሰራተኞች

ኢራንና ኢራቅን በሚያዋስነው ተራራማ አካባቢ ከተከሰተው የመሬት መንቀጥቀጥ በኋላ ከፍተኛ የነፍስ አድን ስራ በመከናወን ላይ ይገኛል። በአደጋው ከ400 በላይ ሰዎች ህይወት ሲያልፍ ከ7000 በላይ የሚሆኑት ደግሞ ጉዳት ደርሶባቸዋል።

ተቀብረው የሚገኙ ሰዎች ይኖራሉ በሚል በፈራረሱ ህንጻዎች ስር የነፍስ አድን ስራው ተጠናክሮ ቀጥሏል።

አደጋው በዚህ ዓመት ከፍተኛ የሰው ህይወት የጠፋበት ነው ተብሏል።

አብዛኛዎቹ ተጎጂዎች በምዕራብ ኢራን በምትገኘው ሳርፖል-ኤ-ዛሃል ነዋሪዎች ሲሆኑ ሌሎቹ ደግሞ የኬርማንሻህ ግዛት ነዋሪዎች ናቸው።

የአካባቢው ሆስፒታል አደጋ ስለደረሰበት ህሙማንን ማስተናገድ እንዳልተቻለ የሃገሪቱ ቴሌቭዥን ዘግቧል።

በከተማው አንዲት እናት እና ልጇ ከፈራረሰ ህንጻ ስር በህይወት መውጣታቸውን የኢራን መገናኛ ብዙሃን ዘግበዋል።

በአንድ ራዲዮ ጣቢያ የተለቀቀ የትዊተር ቪዲዮ እንደሚያሳየው አብዛኛዎቹ የከተማዋ ህንጻዎች ፈራርሰዋል።

በአንዳንድ አካባቢዎች የመብራትና ውሃ አገልግሎት የተቋረጠ ሲሆን ሌሎች ደግሞ አደጋውን በመፍራት በቀዝቃዛው አየር ምሽቱን ከቤት ውጭ ማሳለፍን መርጠዋል።

በኩርድ ተራራማ አካባቢዎች የሚገኙ አብዛኛዎቹ ቤቶች ከጭቃ ብሎኬት የተሰሩ በመሆናቸው እንደእሁዱ ዓይነት የመሬት መንቀጥቀጥን መቋቋም አይችሉም።

Image copyright
EPA

አጭር የምስል መግለጫ

ነዋሪዎች ለሊቱን ከቤት ውጭ አሳልፈዋል።

“መጠለያ እንፈልጋለን፤ ድጋፉ የታለ?” ሲሉ አንድ የሳርፖል-ኤ-ዛሃብ ነዋሪ ጠይቀዋል።

አንድ የእርዳታ ድርጅት 70 ሺህ ሰዎች መጠለያ ያስፈልጋቸዋል ብሏል። በሺዎች የሚቆጠሩ ሰዎች ለሁለተኛ ቀን ምሽቱን በብርድ ማሳለፋቸውም ተዘግቧል።

የተባበሩት መንግስታት ድርጅት “ጥያቄ ከቀረበለት ለመርዳት ዝግጁ መሆኑን” በዋና ጸሃፊው ቃል አቀባይ በኩል ይፋ አድርጓል።

የኢራን ባለስልጣናት 413 ሰዎች መሞታቸውን ይፋ አድርገዋል። ከሟቾቹ መሃል የሃገሪቱ ጦር እና ድንበር ጠባቂዎች እንደሚገኙበት የኢራን ጦር አዛዥ ለሀገሪቱ ዜና ወኪል አስታውዋል።

በኢራቅ ዘጠኝ ሰዎች መሞታቸውን የቀይ ጨረቃ ቃል አቀባይ ለቢቢሲ ተናግረዋል። በሃገሪቱ ያለው የተባበሩት መንግስታት ድርጅት በበኩሉ ከ500 በላይ ሰዎች መጎዳታቸውንና የመሬት መንቀጥቀጡ ንዝረት ኢብሪል፣ ሱላይማኒያ፣ ኪርኩክ፣ ባስራ እና ባግዳድ ድረስ ተሰምቷል ብሏል።

አደጋውን ተከትሎ የተከሰተውን የመሬት መንሸራተት በገጠራማ አካቢዎች ጉዳት የደረሰባቸውን ሰዎች ለመርዳት አስቸጋሪ አድርጎታል። በመሬት መንቀጥቀጡ ጉዳት የደረሰበት አንድ ግድብ ሊፈነዳ ይችላል የሚል ስጋትም ተፈጥሯል።

የመሬት መንቀጥቀጡ በሰሜን ምስራቅ ከኢራን ጋር በሚያዋስነው ደቡባዊ ዳርባንዲካን መከሰቱን የአሜሪካ ጂኦሎጂካል ሰርቬይ አስታውቋል።

ጉዳቱ በደረሰበት አካባቢ 1.8 ሚሊዮን ሰዎች እንደሚኖሩ የተባበሩት መንግስታት ድርጅት ግምቱን አስቀምጧል።

በ2003 የተከሰተው እና በሬክተር ስኬል 6.6 የተመዘገበው የመሬት መንቀጥቀጥ በደቡብ ምስራቅ ኢራን የምትገኘውን ታሪካዊቷን ባም ከተማን አፈራርሶ 26 ሺህ ሰዎችን መግደሉ ይታወሳል።

Read more